【座駕捱撞】李克勤嬲爆：道歉都冇句

尋晚李克勤就撇低老婆同一對囝囝，揸車去咗跑馬地搵朋友食飯，泊好架車入咗餐廳冇耐，就有一名外籍男士揸車到場，外籍男士想泊車喺李克勤架車後面，可能斜路泊車有啲難度，外籍男士先撞到後面架車，之後駛離時再撞到李克勤架車，不過外籍男士未有理會發生碰撞，揸車去咗其他位泊車。

李克勤得悉座駕捱撞之後，立即從餐廳步出查看傷勢，一臉無奈表示：「都唔係好嚴重算數喇！不過最嬲係，道歉都冇一句就走咗。」其後李克勤知道涉事汽車由外籍人士駕駛時，他搞笑表示自己能操流利洋語，可以和對方當面對質，之後李克勤便返回餐廳。未知是否擔心座駕再有危險，李克勤返入餐廳冇耐就埋單走人。