生完BB就脫苦海？仲有排你受！

各位準媽媽 ，係唔係覺得駝BB好辛苦呢

以生完BB就一身輕曬脫苦海？

你可能未聽過生完之後嗰一個月有幾咁辛苦

仲有排你受！



今日就等小編我話比你聽殘酷的現實，各位準媽媽可以做定心理準備



有老公陪產其實老公都分擔唔到個一種痛，不過有老公係身邊安慰自己點都好過冇

先唔講生BB過程猶如被五馬分屍咁可怕，生完嘅折磨簡直令作為新手媽媽不知所措，加埋情緒真係好容易同屋企人大吵一鑊，BB剛滿月，身體嘅不適感已經緩一點。



下陰傷口痛，可用枕頭墊高雙腳，減少傷口直接接觸床鋪引起痛楚。

全身酸痛

生BB時用盡全身嘅力量，尖叫、狂抓、狂push….生完真係無曬力，攤喺病床好似癱咗咁，全身肌肉酸痛，直到第三日先無咁痛，順產就係要出盡奶力，無得避。



會陰傷口痛

生完都唔知剪咗會陰，可想而知陣痛係幾恐怖，但事後更加恐怖嘅係傷口痛，呢個位置真係好攞命，行又痛坐又痛訓又痛，總之咩姿勢都痛。

最慘係喉嚨有幾聲咳，一咳就全身郁，痛到標眼水，住院期間咳到失禁賴濕好幾次，奉各位產前好好顧好身體



生完會極度口乾，準備水樽裝炒米茶，隨手拎嚟飲唔駛下下起身裝水，減少瞓低起身引起傷口痛。

頭三天在床痛到想死，著褲除褲一舉手投足都會郁到傷口痛到喊，沖洗下體時，摸到下面腫到唔知似咩，



最舒服嘅動作莫過於凌空成個pat pat ，建議大家唔駛買水泡喇，坐落去擘開個傷口痛到你彈起呀！



待產醫院餐好清淡，但自己太曳食好多蛋糕、朱古力甚至產前兩個鐘食生果，結果產後有咳嗽，一咳就失禁、傷口劇痛。



另外，心理壓力都會令人好不安，好想知道下面乜狀況，茄蛋媽出院第一日就搵鏡照下體，四個字「亂七八糟」！而會陰嘅癒合程度人人唔同，少則一個禮拜，茄蛋媽因為有血腫嘅傷口，連埋會陰傷口痛足大半個月。

傷口癒合時的痕癢，又不可以R，簡直虐待！



傷口太痛，好自然企起身食飯，但聽講會引起子宮下垂，大家千萬唔好學我。

子宮收縮

一生完隨之而嚟嘅第一個痛楚就係子宮收縮痛，須知道懷孕九個幾月，子宮泵到波咁大，要縮返原本Size必須經過一段時間同收縮。有人話似經痛，但人人經痛程度唔同，我只能夠話，平時十級痛嘅人，會一樣咁痛吧。



產後腳腫，飲紅豆水三日消腫，連身體、臉部嘅腫都消曬。

全身發臭

產後身體會排水，明明一直都係冷氣房，但就一直流汗，餵個奶/食個飯/ 沖個涼，就好似長跑完一樣出曬水，連瞓醒起身都發現背脊濕曬，最慘係腋下汗臭程度似臭狐，我一度好擔心會唔會自此有臭狐，原來係唔會嘅，排完一星期水就回復正常，聽講咁樣排汗係好事，可以產後排毒瘦身。



由於茄蛋媽產後腳腫好厲害，飲左一星期紅豆焗水，去腳腫之餘仲去埋身體、面部嘅水腫，好有效，必跟！

腥臭惡露

產後惡露聽過啦，裡面包含血塊、白血球、子宮內膜、胎盤…試想像9個月嘅月經一鑊過流出嚟會點樣，

最難頂嘅係長時間包住一塊又厚又長嘅產婦衛生巾，然後惡露味道又臭臭地，感覺下面都要發霉了，好彩茄蛋媽流到BB滿月前幾日就清曬。









坐月期間用了一個月即棄棉內褲，平均每日兩蚊雞，係唔環保，但惡露漏落低褲洗唔甩更煩。

乳房嘅悲哀

乳房係另一個最痛苦嘅事情，谷奶痛係我產前無諗過亦完全唔知道嘅一件事，原本以為生完就比奶奶bb食就Ok no problem，無諗過餵奶就係=痛！

首先係谷奶痛，「石頭胸」就係谷奶最好嘅代名詞，谷奶時個胸硬到好似石頭咁，第一次谷奶係產後第5日夜晚，個胸硬到打側訓時掂到張床就痛到彈起！



產後其中一個壓力就是要追奶，幸運是奶量都很足夠



產後第二日嘗盡了試過埋身但唔太成功，所以用好勤力用針筒收集初乳

其次痛係BB啜損嘅痛，損左啜甩曬皮就更加痛痛痛痛痛！唔好睇少呢種皮外傷/ 谷奶嘅痛，係可以迫到人癲！除非較啱BB食奶嘅時間，否則就要出動電泵泵出嚟舒緩谷奶痛。



餵母乳嘅媽媽必須準備大量乳墊，溢乳嘅情況每晚都會浸濕曬成個胸圍

每日餵奶泵奶又係痛，條頸超痛，因為餵奶泵奶都會向下望，感覺已患上肩周炎！仲有係個頭啜到好長、個頭乳雲呈黑青都好惡頂，初初泵奶更會因為想泵多d而狂擠乳房，呢個完全係一個自殘嘅行為。

餵奶低頭、泵奶低頭、抱bb望bb又低頭，坐月期間長時間低頭，條頸真係好痛。

虎背熊腰大肚腩

產後我無馬上去磅重，反而係醫院照過鏡，見到鏡裡面嘅自己，「慘喇慘喇」，個肚皮又The又黑，用手指督一督個肚皮拋下拋下，產後第五日成個人腫曬，面腫手腳都腫，除左飲紅豆焗水消腫，束腹帶都日日用，但好快就回復，不過腰粗背厚唔可能一時三刻打回原形，重點係漲奶令上圍睇落好巨型，變相成個人變到好壯，暈喇

產後一個月零一星期，暫未正式修身，但水腫去曬，剩低個鬆泡泡嘅腩仔，好擔心呢世個肚皮都係咁呀。



茄蛋媽天真地以為生完好快會回復正常，一直都無睇過 「產後症狀」係點，單單係處理身體嘅變化、適應每三個鐘就谷奶控制嘅身體，已經令我就快崩潰，加上嚴重睡眠不足，對於一直樂觀嘅我都憂鬱地喊左好多個晚上

頭一個月真係成世人未試過咁攰，bb會因為唔同嘅問題夜晚訓唔著，加上放題式嘅餵奶日夜無眠，難免令人產生好多負面情緒。

頭果兩星期成個人精神都將近崩潰，好攰好攰，尤其係茄蛋媽返外家坐月，雖然媽咪照顧三餐、幫bb沖涼，每日煲薑水比我沖涼，但日夜照顧bb都係自己搞掂，老公初初體會唔到當中嘅痛苦，可能以為餵奶啫，餵完佢訓你咪訓囉，其實新手媽媽要面對嘅難題太多了，每日都要學習實踐共同進行，要關注bb頭暈身慶、大小二便、餵奶掃風、習慣佢嘅生理時鐘，自己身體嘅痛楚已經無時間照顧好，甚至連去大便都會係一件好奢侈嘅事，果一刻覺得好委屈！



茄蛋爸幫拖餵夜奶，我地用仿頭奶樽，避免bb混淆。

老公每星期放假都會嚟住一晚體驗下坐月湊bb嘅辛酸， 知道好多媽媽產後憂鬱大部分都係因為奶量同埋周邊人無心嘅語言傷害，雖然無奶量不足嘅問題，但精神上嘅折磨都令我一度崩潰，好彩有媽咪嘅支持。

所以未決定請唔請陪月？邊度坐月？記得要考慮清楚邊樣會令自己最舒服，好慶幸 選擇返外家坐月，媽咪無微不至嘅照顧，令初為人母嘅茄蛋媽感動到偷偷喊咗好多次，世上只有媽媽好，銘記於心

唔好睇少呢d產後症狀，如果你就快生，又睇到我今次嘅分享，至少有定心理準備，知道產後唔會咁爽皮，仲可以提早提下老公，減少摩擦，祝各位準媽媽生產順利，產後盡快恢復啦！大家加油。