【獨家有片】情侶車斷正 麥明詩揸男友車 買定外賣等林作開餐

前，「十優港姐」麥明詩突然喊爆自稱分手，而林作出席活動被問及分手一事，又同麥明詩劃清界線嘅林作話大家一直係朋友，從來冇講過係男女朋友關係，麥明詩喺另一個活動亦話自己唔係好睇呢啲新聞，費事影響自己心情，睇嚟呢段感情凍過水。點知喺中秋節正日，麥明詩俾本報撞破佢同林作屋企人喺中環食飯團圓，甚至又有傳佢哋去買戒指，戀情極速翻撻，關係欲斷難斷。(新聞連結：http://bit.ly/2dOrG60)不過紙又點會包得住火，疑似轉做地下情嘅佢哋，噚日就讀者周先生透過本報「爆相爆片」踢爆，前日夜晚11點半左右喺紅磡德民街見到佢哋兩個短敍。周先生話：「嗰陣見到麥明詩揸住架白色車，泊低咗架車之後，自己一個人行咗去內街，不過冇耐又見佢上番去架車，隔咗一陣見到林作揸住架紅色車，不過佢唔係第一時間泊低架車，反而兜咗一個圈之後，先將架車泊喺女友架車側邊。」周先生仲話跟住林作上咗麥明詩架車，原來麥明詩一早買咗嘢食，諗住同男友齊齊嘆：「本來林作都好避忌，成日見到佢周圍望，仲全程好似好避忌，不過上咗麥明詩架車之後，態度明顯放鬆咗，大家有傾有講，食咗半個鐘左右，大家揸番自己架車走人。」查實喺今年7月麥明詩同佢哥哥夾份買咗一部價值約70萬Tesla新車，好多時候都見到佢揸住架車開工，甚至喺上個禮拜天文台發出黑雨警告當日，麥明詩喺Ig上載咗條片，睇見佢好狼狽咁著住拖鞋澗水行去揸走架Tesla，點知過咗一個禮拜，麥明詩變咗揸住白色嘅ALFA ROMEO，雖然同林作嗰㗎紅色ALFA ROMEO屬一個車廠，不過價錢相差一截。而根據車輛登記資料顯示，原來麥明詩嗰晚揸住嗰架白色車，登記車主係林作，地址係麥當勞道，似乎一切盡在不言中。事後分別向兩人求證，麥明詩話：「唔回應嘞，日常生活瑣碎事唔同大家交代，專心工作。」林作亦都話唔回應！＋另一方面，麥明詩嘅緋聞男友何浩文(Dominic)喺ig貼同女友去台灣慶祝生日嘅相，唔知係咪想示威？Dominic透過whatsapp回覆：「被撞到孖住出嚟呀，哎吔，咁唔小心呀。示威，我唔做呢啲嘢，示威留番啲人上街做，我喺台灣冇得示威，我唔係呢度人，我係香港人，喺台灣冇得示威。」有啲酸味！