已北上工作多年嘅藝人賈曉晨（JJ）同老公樊少皇，近日被大陸網友拍到喺北京因車輛問題與路人爭執嘅片，片中見JJ與路人爭執，情緒激動。
爭執時被鬧「刁民潑婦」
片段中聽到JJ話：「我明明看到有車跟我們一塊兒進來的，就攔着不讓我們進！」佢又嬲爆地指責路人不講道理，而樊少皇似在身旁勸解不果，期間激動到爆嘅JJ，仲一度推開樊少皇，勁冇癮嘅樊少皇，只好自己一個匿返上車。JJ就繼續同對方嘈，更被路人鬧佢「刁民潑婦一樣！」片段被大陸網民瘋傳。
微博解話指自己畀人圍
JJ喺今日凌晨就喺微博上載一大篇文章，為自己喺片段中嘅表現解話。佢指當時自己畀七、八個大男人圍住，對方莫名擋住條路，企喺佢同樊少皇架車前面，仲用磚頭「封路」唔畀佢哋過。當下佢就嬲到上心口，決定同對方理論，仲鬧爆對方不講道理。JJ又指自己當時已經報咗警，不過遠水不能救近火，所以佢先會據理力爭。
公開道歉認衝動
事後佢返到屋企都有畀屋企人同朋友話，指佢太衝動，所以JJ都有喺文中向大眾道歉：「在此我也表示一下歉意，可能自己當時確實太衝動了。但這個歉意是對自己來說，並不是對那些討厭的傢伙說的。如果以後還遇到這樣的事情，我會依然堅決反抗到底，但會保持好自己的情緒。最後，謝謝大家的關心。」
沒有留言:
張貼留言