【同Stephy分手半年】驚爆「超力戀」 小方超蓮拍拖3個月？

何家三房千金同明星特別有緣，好似超雲早年同陳山聰拍拖嗰陣，以為佢做硬何家女婿，點知忽然撻Q，至於細妹超蓮就先同吳克群甩拖，跟手又同「富三代」霍啟山撐枱腳，點知最終揀咗方力申!!!

方力申同拍拖十年嘅Stephy(鄧麗欣)分手，當時小方同Stephy都喊晒，不過件事過咗半年，小方即重新出發，早前先傳出小方透過李蘊囡囡搞百日宴識到超蓮，席上小方大獻殷勤，坐超蓮身邊，二人有傾有講，有傳超蓮去洗手間，小方都企喺門口等，今日有周刊指，36歲小方同超蓮拍拖3個月，小方做咗「點滴是生命」嘅活動大使多年，上周就同超蓮一齊去尼泊爾做義工，據知以往嗰三年，小方都會搵埋Stephy一齊，點知今年就換咗同行嘅超蓮，去探訪喜馬拉雅山腳嘅貧民區過咗5日4夜。周刊又指，二人喺上周六跟大隊返嚟，小方成程企喺超蓮身邊，細心為超蓮開支水，仲一支兩份飲，小方仲出手掃超蓮背、又輕摸頸，又離隊5分鐘，行埋一邊睇相調情，有指係因為G.E.M.同李蘊撥行大葵扇先令小方同超蓮撻著!?據知情者向報道爆，有次小方同超蓮一齊上銅鑼灣私竇飲嘢，幾杯落肚，即坐得好埋，當時友人仲以為小方仍為Stephy傷心，怎料小方已搵到下一個目標。有關小方嘅報道，小方透過公司回覆：「今次他們二人都是以大使身份為點滴是生命到尼泊爾探訪，佢哋只係朋友關係，其餘就無回應了~~」