【逐年睇】容祖兒13年霸奪最優秀女歌手 網民：不如退落嚟

樂壇應該有其流動性，但香港娛樂圈，歌影視都面對青黃不接的問題，而港台十大中文金曲頒獎禮，同商台叱咤樂壇流行榜頒獎禮都反映咗香港樂壇新晉歌手缺乏向上流動嘅機會，叱咤樂壇男歌手大獎係張敬軒，女歌手大獎係容祖兒。

今晚港台十大中文金曲頒獎禮，最優秀流行男歌手係陳奕迅，女歌手係容祖兒。呢個獎喺2004年設立，至今13年，男歌手方面，除了首屆由李克勤奪得之外，其後連續12年都係陳奕迅囊中物，而容祖兒則是該獎設立以來，唯一一個得過嘅女歌手。之前祖兒在叱咤頒獎禮慶功上，講到入行18年、攞咗11次女歌手金獎，佢話：「都係一個記錄，對自己18年青春有交代。（下年可以唔使嚟？）去唔去慶功都冇得揸主意啦！」事後有網民戥祖兒不值，認為祖兒想退下來、唔使俾人話佢「霸住個位」，無奈身不由己，就連「去唔去慶功都冇得揸主意啦」，不自覺地流露咗其心聲。今晚祖兒仲誇張，連續13年捧走最優秀流行女歌手獎，加埋全晚共有四個獎，當時鏡頭影住台下歌手，各人臉上都係冇反應，包括鄭俊弘，只係機械性咁拍手掌……司儀仲講錯咗祖兒係第14次摘最優秀流行女歌手獎，其實係13次。