搵錢好辛苦】賈曉晨回應老公欠債200萬：少皇借咗我先知

太陽娛樂老闆周焯華（洗米華）今日喺上環信德中心同洗米嫂出席澳門廣場開幕禮，同場仲有鄺美雲（Cally）、賈曉晨（JJ）、劉威煌、前組合EO2成員彭懷安（Eddie）等。 JJ(賈曉晨)表示近日忙於喺大陸開劇，一套接一套，對於老公樊少皇早前被爆欠債200萬遭上門追數事件，佢再解釋：「我哋出咗律師信，我哋財政冇問題，朋友利用佢身份證借錢做擔保，佢朋友還晒嗰筆錢，但私下仲問佢借咗300萬港幣就未還，少皇借咗我先知，我叫佢以後唔可以再借錢畀人，搵錢好辛苦。」同場前跳舞組合EO2成員Eddie否認同朱慧敏復合，佢話：「隨緣，大家各有各忙。」 Cally話呢排瘦咗，有本錢食多啲，佢大讚：「嚟到呢到要食佢嘅喇沙同菠蘿包，好多港式美食。」Cally仲話日頭食唔怕肥，佢每個星期都會跳舞兩次做運動；Cally大讚小米女可愛。劉威煌早前開珍珠奶茶店月賺八萬，佢話：「我成本成百萬，o依家賺咗五位數字尾，開咗兩、三個月，希望九個月到一年可以回本。」