張致恒認偷嗒台妹：我喺行為上出咗軌

藝人張致恒（Steven）早前同女友莊端兒（Xenia）拍住拖帶羅霖囝囝跳彈床，但日前他又被《東網》獨家影到同台灣圈外富貴女子Doris密會疑似 偷食斷正，有劈腿嫌疑的他接受電話訪問時，竟自爆莊端兒已是前度女友：「其實我同莊端兒已分手一段時間，唔公開講係因為我未同女方溝通，況且我覺得感情係 兩個人嘅嘢，毋須公開同外界交代。」

至於跟現任「女友」Doris的關係，他直認曾追求過對方，雙方有過「曖昧」關係，但又不算是「拍 拖」，只是到訪過對方香閨兩次，問到如何認識？他說：「喺Facebook識咗好耐，但一直冇講過嘢，但佢住喺將軍澳，我又返無綫，咪上佢屋企探佢囉。 （上咗去幾多次？）兩次。」

言談間，Steven表現得深感後悔，不停認錯，更坦白從寬自揭難抵誘惑，不停重複犯所謂「全世界男人都會犯的錯」：

記者：同Doris發展到咩階段，有冇錫過？
Steven：有。
記者：上埋床？
Steven：總之我冇喺佢屋企過夜，我唔想講到咁白，你明唔明呀？成件事我唔知點呀，其實我好內疚。
記者：冇上床唔算出軌？
Steven：每個人都有一個定位，唔一定擺落口食落肚就叫食咗，其實你「lam」過都當食咗，男人攬過女人都代表行為上出軌，唔係食咗先叫出咗軌。
記者：係咪衰花心？
Steven：我咁多年都係咁，我都唔知點解，我真係唔適合拍拖，可能真係，唉……傷害人，傷害自己。
記者：下次唔好再咁做？
Steven：（悲哀聲）我唔想㗎，你明唔明？我真係好想結婚，我就係一個咁樣嘅人，好難去改，你明唔明呀？我都好心痛自己點解成日都係咁樣？

「我控制到控制咗啦」

記者：因為係男人，因為鹹濕？
Steven：（哀嚎）唔係我想㗎，我控制唔到，我控制到控制咗啦，男人……女人都可以鹹濕㗎，都有呢方面嘅女仔㗎嘛。
記者：你可以拒絕人哋嘛？
Steven：我……我拒絕唔到囉，OK？我……我自制能力好差囉。
記者：同Doris再發展落去？
Steven：未必會啦，唔再發展落去有其他原因嘅。

Steven 強調肉體上沒有背叛過前女友，不過認衰說：「我唔係一個100%嘅好男人，亦唔係稱職嘅男友，我好多嘢都做得好差，我喺思想、行為上出咗軌。」又自認沒形 象可言，緋聞對他最大影響不是毁事業，而是：「會影響我整個人，我由細到大都係咁，自己（惡）果，自己食番囉。」

莊端兒就男友張致恒偷食一事接受《東網》訪問，一度哽咽直認有其事兼已經分手：「幾個月前係佢同我提出分手，因為做咗啲對我唔住嘅事。」對於男友是否偷食有前科，莊端兒就「好女友」上身唔肯正面回答。