.: 有靚樣邊個想做豬扒？樂瞳就得咗喇！

有靚樣邊個想做「豬扒」？喺香港做得女演員大部份都係靚女，想搵個醜女演醜角係有啲困難，加上靚女女星只想以最靚嘅一面對住鏡頭，唔願意嘗試新角色，搞到香港醜角演員相當「渴市」。過往有不少女星不惜自毀靚靚形象走去演醜角，上位快過坐穿梭機。好似周星馳「卸用醜角」苑瓊丹咁，佢喺《唐伯虎點秋香》中演嘅「石榴姐」，可以話係醜角佼佼者，「石榴姐」即刻廣為人識。仲有參演《豬扒大聯盟》嘅大美人李嘉欣同莫文蔚、《少林足球》嘅趙薇等，都願意放低美貌，演嘅醜角令人津津樂道，成為當時熱門討論話題。

放低可愛形象做醜女！

身形嬌小嘅樂瞳之前喺劇入面都係以可愛做形象，做親都係可愛、靚女𡃁妹。今次佢唔介意放低可愛一面，喺無綫新劇《為食神探》入面飾演又黑又有汗斑，仲成身鹹魚味嘅「鹹魚妹」，雖然佢出鏡唔多，不過已經有不少觀眾留意到佢，獲網友大讚勇於嘗試，永遠支持佢。亦有網民笑佢滿面油光，醜到冇朋友！

醜角早死名留千古

《為》中樂瞳飾演一個皮膚黑黑嘅鹹魚妹小蓮，經過嘅地方都留低一陣鹹魚味，面上仲有幾點汗斑添，可以話係個不折不扣嘅村姑。雖然佢很醜，但就好溫柔，遇到個又有錢又叻嘅力勤（楊明飾），而且仲係真心愛佢。不過小蓮醜到自己都唔敢相信可以搵到真愛，暗地裏搵私家偵探查力勤。雖然查明力勤對佢真心真意，不過小蓮個角色都係悲哀嘅，今晚仲會畀人害死咗。網友就話：「小蓮咁快死可能對樂瞳嚟講係好事，因為佢個醜樣唔會留在觀眾心中咁耐，期待佢下一套靚女劇。」

小蓮個角色係樂瞳咁多年演戲生涯入面最醜嘅一個，樂瞳講過試造形時幾乎認唔到自己，雖然佢覺得好新鮮，不過有少少接受唔到，搞到自卑感大增。樂瞳今次咁大犧牲，網民都希望個醜角可以為佢嘅演藝事業帶來一番新景象，等大家可以唔睇佢個靚樣專心留意佢嘅演技。

網民熱話
蕤x：成日都演靚樣，其實會留意唔到演技。嘗試唔同角色，也是豐富個人所得。
Wixxsor Lxx：都係時候轉一轉，樂小姐我撑妳，努力，加油。
Mxx Wxh Lxx ：真的認不出，做演員甚麼角色都扮演得正！
Ka Wai Stxxxen Fxxg：果然是認唔到，滿面油妹！