2016年11月04日 【獨家】分手後打回原型 樂瞳坐港鐵嬲爆爆？

近排樂瞳頭頭碰著黑，先係有傳佢同金融男友分手，係因為佢識咗一個富二代，最近仲有傳佢因為太高調，搞到戀情見光即死，不過事後樂瞳話只係朋友關係，大家幻想太多。

噚日有讀者徐先生，透過本報「爆相爆片」話喺見到樂瞳坐港鐵，嗰陣佢由中環開始講電話，一直到美孚都未收線，兼且佢仲全程嬲爆爆添！徐先生仲話嗰陣係放工時間，地鐵車廂好多人，不過唔知係咪因為佢素顏，所以認得佢嘅人唔多。事後樂瞳接受傳媒訪問，佢話冇諗過自己搭地鐵都會俾人影，至於嬲爆爆講電話，佢就話：「點會呀？我只係啱啱做完運動，成個人都好攰，所以咪冇乜表情啫！」之不過近排因為關愛座呢樣嘢，搞到好多爭議，有人直言話就算乘客疏落都唔敢坐，費事俾人喺網上公審，樂瞳話：「我平時都會搭地鐵，但係關愛座我一定唔會坐，留俾啲有需要嘅人，不過就算我坐其他位，見到有需要嘅人，我都會9秒9彈起身。」嗯！咁就乖豬喇！