【獨家有片】右眼遮紗布 王菲秘密返港醫眼疾

兩年前，分手11年嘅王菲同霆鋒，世紀復合，兩年來，二人雖然各有各忙，不過感情依然有增無減，反而外間較關心係，霆鋒同王菲女竇靖童，究竟夾唔夾得嚟，而日前童童現身霆鋒《十二道鋒味》節目，二人一輪互攬後、邊煲煙邊傾偈，足見關係好融洽！

囡囡同男朋友仔咁friend，夾喺中間嘅王菲自然放下心頭石，亦有時間花精神，處理身體上嘅小毛病。 日前(上月26日)下晝近6點，《蘋果》目睹王菲坐開嘅七人車，停喺旺角鬧市，冇幾耐戴住cap帽、着住深灰色T裇、淺灰色闊褲嘅王菲，行落七人車，沿路一直耷低頭，由助手陪同下，行入惠豐中心，搭電梯上9樓，到視力中心求診。由於診所本身收6點，診所內人影冇隻，但王菲依然高度戒備，耷低頭坐喺一角，隔咗陣，佢就入咗一間房，而記者睇水牌，發現診所有專幫病人做白內障、視網膜同黃斑點手術。而據知，徐子珊前緋聞男友謝偉業亦係呢間眼科中心嘅執業醫生，平時都有唔少明星藝人幫襯。王菲喺診所逗留1個鐘後，就耷低頭急急腳離開，期間，當佢等大廈電梯時，記者發現其右眼用咗大塊紗布遮蓋。到落到樓下行人路有唔少途人，王菲下意識用手揞實塊面，極之避忌。由於七人車泊正喺大廈門口，王菲只需行幾步路就跳到上車，七人車隨即駛返深井皇璧寓所。