撐老婆 超儀 剝 阿徐 皮

雖然 Eason出面撐，但阿徐心情仍未好番！

因為放相上私人 IG而令陳子聰消瘦病容曝光的徐濠縈，雖然已向何超儀道歉，並獲對方表示原諒；但事隔兩個月，超儀卻公開寸爆阿徐有分享症，又自稱討厭分享，聲言同阿徐冇聯絡。

舊事重提，超儀此舉即時辣着愛妻號 Eason，更同友人鬧爆對方「講一套做一套」，專登搞大龍鳳落阿徐面，表明以後冇朋友做！

舊事重提

老公陳子聰病容曝光，何超儀至今仍耿耿於懷，早前更公開寸爆徐濠縈有分享症，聲言討厭同人分享的她又直指與阿徐已經再冇任何聯絡，毫不留情地數落昔日好姊妹，令曾表示同超儀尚有聯繫的阿徐，更加冇晒面。
為此，徐濠縈心情極度不佳，老婆愁爆，身為老公的陳奕迅，亦對超儀所作所為有微言。

阿徐在私人 IG放陳子聰激瘦病照，觸發姊妹反目。


8月初陳子聰因病入院， Eason匆匆趕到醫院。 


氹極阿徐都冇反應， Eason冇癮惟有自己玩電話。

「阿徐放相上私人 IG，純粹係佢見子聰好番好多，戥對方開心，冇諗過會俾人攞咗嚟登。不過，佢都知道係自己大意疏忽，所以都即刻打電話同超儀道歉認晒錯，就連 Eason都有親自打俾超儀，當時超儀仲話知道阿徐係冇心，唔會放喺心度，叫佢兩公婆唔使擔心。
「點知件事過咗成兩個月，超儀忽然又攞出嚟講，仲寸爆阿徐有分享症，講到好似佢有心放料咁，阿徐真係好唔開心！ Eason亦有同身邊幾個朋友狂呻，話超儀講一套做一套，專登搞場大龍鳳出嚟落阿徐面！咁以後唔好再做朋友囉！」知情人說。

嫌疑最大

事實上，當得知陳子聰有病， Eason兩公婆都相當擔心，後來醫生批准陳子聰放假出院，超儀想搬去酒店住，等老公靜養，當時阿徐都有份陪超儀去搵地方。
「就係因為阿徐同超儀去睇過地方，所以先會被懷疑放料，佢冇諗過，大家識咗咁多年，超儀都唔信自己，所以阿徐先咁唔開心！」徐濠縈身邊好友說。

昔日阿徐兩公婆經常同超儀三人行。


12年黃浩爆出藝人濫藥風波，阿徐與超儀聯手開記招。


超儀澳洲婚禮，徐濠縈是姊妹之一。


好姊妹

徐濠縈與何超儀相識超過廿年，當年阿徐和 Eason拍拖，也是超儀做紅娘撮合，多年來，阿徐同超儀好似孖公仔咁，互相見證人生重要階段。

Eason榮獲博士
14年，陳奕迅獲英國母校倫敦金斯頓大學頒授「 Honor Degree of Arts」榮譽博士，表揚他對音樂上的貢獻， Eason一家飛英國觀禮，何超儀夫婦及一班好友亦有拉大隊到賀。

超儀受勳
早年何超儀憑喪屍片《 Open Grace》啞女一角於歐洲黑山走紅，去年，更獲黑山政府頒發女爵士名銜，表揚她對電影熱誠。第一次獲封女爵士，陳奕迅、徐濠縈、劉浩龍等一眾好友組團現身見證。

演唱會互撐
每逢 Eason開演唱會，何超儀兩公婆必定現身撐場，去年，何超儀與樂隊 Oni Boys在九展舉行演唱會， Eason兩公婆亦有到場支持。