畀陳法蓉當眾訓斥 梁小冰嬲爆拒合照

藝人梁小冰出席慧妍雅集活動，她於現場婉拒跟陳法蓉合照，問到所為何事？她說：「佢比較直腸直肚，我烈女性格，佢話我唔着制服（外套），我件外套係擺咗喺車度，佢兜口兜面話我好唔識大體，一嚟到就話我，佢唔應該咁講。」

要求道歉：唔可以咁倔

小冰又謂自己從較冷的地方回來，覺得香港熱才沒有穿外套，又指自己身上件衫亦是制服：「冇人話我知原來要着成set制服，佢應該要有禮貌講，幾熟嘅朋友都要保持禮貌！所以我直頭拒絕合照，亦唔需要合照，呢個係我烈女性格，佢好冇禮貌！（要求佢道歉？）要㗎，我會私下打電話畀佢溝通，任何一個會員都要以禮相待，應拉埋一邊講，唔應該大庭廣眾下訓斥人哋。」她更着大家睇吓佢依家有幾㷫，她說：「我係好易被撻着，但好易冇事，氹番兩句就冇事，自己係受軟唔受硬，錫我嘅朋友都知，唔可以咁倔，咁樣好難做到朋友。」

強調大家唔熟

小冰又謂與陳法蓉10多年來很少見面：「本身唔係好熟架咋，我覺得愈唔熟愈要客氣，愈熟同家人都要有禮貌，要以禮相待。」她又指對方話自己着衫不合格：「我唔覺得佢係訓導主任，邊個畀權佢？大家都係會員，大家平等。」

揚言不再出席同類活動

講到早前被指當街篤魚蛋而跟路人對罵，她笑指懷疑自己前世是俠女，有俠女性格，她解釋當時是相勸路人不要衝燈過馬路。問到會否覺得作為公眾人物公開發聲會較蝕底？她說：「唔會，最緊要講道理，唔應該我係公眾人物就唔出聲，係講公義公平，冇理由畀人『恰』到上心口都唔出聲。」又謂大部分時間都叫自己忍耐。到活動尾聲，王愛倫上前搭梁小冰膊頭安撫她，小冰稱以後都不出席這些活動，然後一支箭衝上老公的座駕。