係呀！我係揸本田，咁點吖？

無錯而家又係到咗11月澳門格蘭披治大賽車嘅時候，每年一到呢個時候風，所有揸跑車嘅朋友都會杯弓蛇影，尤其係一個品牌--本田！
其實我好想喺度同執法者講一聲，如果駕駛態度係唔好嘅話就揸乜嘢都係唔好，唔關乜嘢牌子事，某一個車廠只係生產一啲較容易操控駕駛，性能亦比較高嘅量產車出市場，滿足駕駛者嘅樂趣同埋操控感，但唔該唔好標籤左某一種牌子汽車嘅朋友，的而且確有一小撮人係非常過分，但都唔能夠一竹篙打一船人，唔通你真係認為我仲會揸住部電視機去飛公主道？我換左套鮑魚就一定係飛西貢？
咁當然，駕駛者本身嘅態度同埋禮貌都好緊要，但如果因為我係揸某一個牌子嘅汽車就會俾人標籤的話，我想喺度大大聲聲咁講一句：我係揸本田呀！咁又點？我唔需要你鍾意我，但請你唔好討厭我！我以我揸本田為榮，亦都多謝本田之父--本田宗一郎。