【「3中出」】新Civic Type R多窿多喉傳至少340匹

本田（Honda）今日下午喺巴黎車展公布全新Civic Type R嘅原型車（Prototype），呢款原型車係建基於最新嘅第10代Civic。 
新Civic Type R沿用五門掀背格局，車身添加咗大量進氣及透氣孔，例如引擎艙蓋、泵把兩側氣壩，亦有大少不一嘅擾流翼、副翼及細翼，車尾底部亦裝有導流槽，擺到明要玩盡氣流力學同增強引擎進氣及散熱效能。

輪圈方面屬20吋，金屬閃亮黑加紅色襯飾，同擾流「裙腳」紅線呼應。喂！幾時有1:43模型車？
新Civic Type R嘅開發測試車輛，早前曾被狗仔隊影到配「3條排氣喉」，今日發表之原型車的確採用3「中出」喉，令人諗起法拉利（Ferrari）經典F40。
新Civic Type R預定來年下半年發售，廠方目前未有公布機械規格詳情，但有傳最大馬力至少340匹，估計喺來年3月嘅瑞士日內瓦（Geneva）車展，將會有進一步數字及技術詳情公開，亦好大機會Show個內櫳畀公眾先睹為快。