青年新政成員游蕙禎「處女下海」，喺facebook首次面對鏡頭做live，講述前日聖誕節係香港保衞戰嘅七十五周年，又借題發揮話中學教科書好少提及香港保衞戰嘅詳情，又指教科書中只集中講述一九三九年港督楊慕琦宣布無條件投降。翻查相關資料，楊慕琦一九四一年先獲任命為港督，就任三個月後，喺同年十二月廿五日向日軍無條件投降，講歷史連年份都搞錯，唔怪之得畀網民狂轟佢唔識就唔好亂噏。
被斥冇做功課亂講歷史
游蕙禎話當年有年輕但缺乏經驗嘅加拿大軍人喺黃泥涌峽呢個重要戰場上死守咗兩日，但當時英國就因為香港唔係二次大戰嘅主戰場而冇畀加軍足夠軍備作支援。佢又話當時加軍嘅人數比日軍嘅少五至十倍，香港嘅歷史教育亦應提及呢一群軍人，唔應該隻字不提。
但網民表明對其發言冇興趣，仲叫佢盡快向立法會歸還相關薪津，直指「講甘（咁）多野（嘢），快回水啦」；亦有人認為佢對呢段歷史冇深入認知，反指「游同學，你有冇做功課㗎，唔好亂講啦。」
喺呢個時候講呢場保衞戰，佢係咪想借意將自己刻畫成當年嘅加軍，縱使守唔住，都要歷史留名呢？
游蕙禎喺fb講香港保衞戰嘅歷史，唔少網民表明對佢嘅發言冇興趣
沒有留言:
張貼留言