陳凱琳發姣四圍放電 鄭嘉穎「咪撚叫我條女做BB」

近日前港姐陳凱琳（Grace）被指搭上新歡造型師因而飛甩熱戀中的男友鄭嘉穎，嘉穎昨日在澳門出席活動時，卻隔空向女友造型師「開拖」， 講到明不批准對方再叫Grace做「Baby」，皆因「Baby」乃專有名詞，認真Man到爆！ 而Grace對於男友言論亦相當冧，還大讚他為人有趣兼幽默。 【林希孺澳門直擊】藝人洪金寶、鄭嘉穎、「太監五虎」黎耀祥、曹永廉、黃浩然、陳國邦、蕭正楠（Edwin）等 昨日出席「香蔓蕾文化發展有限公司」在澳門新濠影滙舉行的頒獎典禮。 與前港姐陳凱琳（Grace）拍拖的鄭嘉穎，對於近日女友被指搭上新加坡造型師Martin，與嘉穎斬纜， 雖然雙方已第一時間否認，但嘉穎仍成為活動焦點。 Grace讚男友幽默 剛與無綫結束16年合約的他，對於有指Grace有新歡令二人分手，心情大靚的嘉穎坦言對該些新聞習以為常，大方地說： 「有咩好嬲，成日發生，唔係事實就得，但我唔准造型師再叫Grace做Baby，知佢本身鬼鬼哋，但都唔准，因為Baby係專有名詞。（仲有咩唔畀？同男仔單獨食飯？）食飯幾咁閒，係唔准人叫佢Baby，你問嚇林峯畀唔畀人叫佢女友做Baby。（人哋叫BB？）差唔多啦！（平時叫Grace做乜？）唔話你知。」 對於男友Man爆言論，Grace接受本報訪問時當然冧冧豬，大讚男友有趣兼幽默：「當初我哋聽到呢單新聞覺得好搞笑，所以佢咪用搞笑方式去答大家囉！」 洪金寶唔怕辛苦撐天明 而「太監五虎」成員Edwin一出現即搶住拎訪問咪，笑指要準備留給老闆阿廉講話， 問到有否興趣「五虎」合資做生意？阿廉搞笑說：「海味有人搞咗，搞食嘅就啱啱執咗笠，等個市好啲先啦！ 其實都好想同兄弟多啲出嚟活動。（班兄弟嚟唱歌表演係友情價？）我尾數未畀佢哋，所以要睇表現囉！」 而盛傳不再續約無綫的國邦則說： 「其實時間上同無綫係未完結，但工作就完成曬。」更指將在浸會大學執教鞭。 由於洪天明是公司股東之一，他的爸爸洪金寶專程到場撐兒子，並擔任壓軸嘉賓，更自掏腰包幫襯以作支持， 雖然今早便啟程到泰國拍戲，但為撐兒子也不覺辛苦：「次次都打到飛起，希望每部戲都做得開心，票房唔係最重要。」 更透露聖誕及新年會攜愛孫出外旅行，問到可有催天明再生B？ 洪金寶笑說：「睇佢想唔想，我希望佢生多個女，想屋企有三十幾人，我好傳統o架，鍾意大家庭。」 文：影視組