【有珍貴泳褲相】黎明50歲 10大經典

天王黎明（Leon）12月11日50歲生日，Leon入行超過三十年，咁多年嚟真係大娛樂家，畀咗好多花生我哋食，仲有「明福俠」、「金句王」嘅稱號，真係一有佢出現嘅地方，個個都會捧場同支持呀！其實Leon有幾經典，真係就算空肚唔食早餐都數到啦！Leon至少有10樣不可不知嘅威水史！ 1.永遠嘅男神 Leon 拍過唔少膾炙人口嘅劇集，《人在邊緣》、《今生無悔》、《回到唐山》、《天涯歌女》等已迷倒萬千少女，仲要係chok嘅始祖！唔好以為Leon只係得兩個髮型，佢都曾經試過金毛碧咸look，不過就.....，唔使一星期就金髮染黑，得咗！就算依家佢已經50歲，仍然保養得宜，話佢係「美魔男」，邊個會反對？ 2.廣告天王 Leon其中一樣最巴閉，就係拍電訊廣告好似拍戲咁，一拍就十二年，當中唔少經典場面同對白，真係大家嘅集體回憶，好似「我好忙，陪唔到你，希望你understand」、「你着多件衫，咪少啲人衝動囉」、「阿May，點呀？」簡直冧死女！拍廣告當戲咁拍，認真到危險場面都親自上陣，好似一幕「笨豬跳」，點會唔記得！歷代廣告有唔少「明女郎」出現，個個又索又猛料，好似韓國女神全智賢都有份架！ 3.金句王 話明金句王，Leon全方位都有獨特睇法同金句，好似有：「我朝早唔會空肚食早餐」、「坎坷過後有艇搭」、「有冇機會拍拖同見鬼一樣，都係要講緣分嘅」、「多謝工作人員，其實係唔啱，佢哋有出糧嘛。你去餐廳食完飯埋單，唔通畀完錢再去同經理講多謝咩？應該對工作人員就講辛苦晒，對觀眾就講多謝！」 4.「神級公關」 相信大家仲記得佢今年四月破天荒喺中環海濱舉行八場4D演唱會，但因為帳篷問題搞到第一場開唔成。Leon非常貼地咁透過Facebook立即認錯 ，主動承擔責任，多次自拍短片報告，咁有膊頭，全城讚好！佢出色嘅公關技巧，不知幾多人大讚，仲話佢唔做明星，都可以做一位出色嘅公關𠻹！ 5.索女多籮籮 Leon一直係公認嘅男神，同過唔少嘅靚女傳緋聞真係唔出奇！名單多不勝數，陳松伶、周海媚、周慧敏、李嘉欣、舒淇，連韓國第一代嘅女神金喜善都上榜呀！其中同舒淇仲拍咗七年拖，之後又同名模樂基兒結婚。嘩！個個都係女神咁！咁又係嘅男神就應該配女神嘅！咁先登對呀！ 6.好好先生 如果講好人好事，點少得Leon。贈六位數字醫藥費畀佢嘅員工、包晒助手嘅結婚酒席等等，全部都係好低調咁默默幫，而Leon不單對朋友好，對鄰居都一樣體貼！Leon知道開親架500萬法拉利戰車，都會嚇親隔離屋個小朋友後，即刻送果籃道歉，仲要割愛蝕賣戰車！ 7.情有獨「J」 Leon鍾意J！咁多年嚟力捧過唔少女藝人，特別鍾情J字嘅女藝人，例如：Janice、Janice Man、JW、JC 。個個都係J字頭，仲要個個都係靚女𠻹！想搵Leon幫手，改個J字啦！ 8.泳褲係底線 當年黎明同張曼玉嘅經典電影《甜蜜蜜》中，有一幕係要同張曼玉親熱，拍床上戲梗係着得少啦！Leon都係着得少，但係上床就唔着底褲要着泳褲！底褲對Leon嚟講真係好重要㗎！前妻樂基兒都爆過，Leon鍾意自己上網買底褲，唔會畀佢買就知啦！ 9.明福俠 Leon都好貼地，仲好識玩Facebook，仲化身為「明褔俠」拍片玩轉自己，同網民有晒互動！成為網紅嘅「明褔俠」都一樣多金句包如「一Book不能藏two face」外，又自讚「器量」大又識得Rap！唔知係咪「明褔俠」知自己太紅，所以早前宣布要離開黎明！ 10.跳舞 講舞技，對Leon嚟講真係..... 雖然無論空肚定飽肚都唔鍾意跳舞，但Leon都唔會避得就避，好似之前個個唱咁，佢歌照唱舞照跳，仲話自己做埋排舞老師，話今次要為佢榮譽而戰，要跳舞時做一個有感情嘅木頭人喎！