【等了又等】每年續約但苦無機會 洪天明：冇可能一世等

洪天明、唐文龍、李綺雯、陳華鑫、王梓軒等今日去尖沙嘴支持好友莫家淦香港第5間眼鏡店HAChill開幕，莫家淦同天明都有帶埋囝囝現身。

天明話因為太太周家蔚有約，所以今日獨力帶兩子TJ和JT支持，大仔JT和天明一個餅印，活力十足，似晒爸爸。天明透過稍後會和唐文龍合作眼鏡生意，由讀設計出身嘅唐文龍會幫手設計。現時天明經營生意眾多，包括飲食、杭州工作室、服裝等等，未雨綢繆，仲希望喺香港開星馬美食，要搵信賴朋友幫手，忙足一整年，天明今個聖誕會享受天倫，一家去旅行。近年天明喺內地工作居多，又搞生意，但佢否認想退居幕後：「同無綫仲有約，藝員好被動，等公司安排角色，同公司關係21年，希望保持住，安排到理想角色俾我，再浮沉就要諗有冇第二啲途徑做其他嘢，現時同公司合約一年一部，每年續約，話晒咁多年唔想斷。」事實上近年天幾乎絕迹無綫，問佢會唔會覺得被投閒置散？天明話：「明白未到擔男一公司冇可能俾你，但我冇可能一世等，希望安排到，我要求唔係好高。」天明直認已等機會兩、三年，真係等到公司覺得冇價值時先會去第二度試，唔想離開最大原因係好多共事朋友在公司。近日葉翠翠因大肚被減人工，天明就好好彩冇被減薪，仲話人工唔算高，主要收入來源亦唔係公司，只係等機會。天明每次續約時，都有向公司反映，可惜每年如是，佢會等埋最後一年，俾多次機會自己，但聽落天明等到意興欄珊。提到佢好友曹永廉和吳家樂噚晚喺台慶獲獎，天明好戥兩位開心，會叫阿廉請食飯慶祝，佢仲話知道家樂多年為公司付出好多，又憶起多年前曾經喺無綫台慶攞獎，好希望再喺公司得獎鼓勵，但目前兩個仔就係天明最大鼓勵。至於莫家淦現時除了做幕前，仲有經營其他生意，又希望同天明合作其他範疇生意。至於好友李潤庭偷食事件，莫家淦話有私訊對方問候，希望對方撐得住。