張秀文有機會升呢晶女郎！

無綫「咪神」張秀文擁有34D巨胸身材，曾喺遊戲節目大晒咪咪，成功升呢宅男女神，之後佢「食住條水」，出騷或者做節目都經常性感示人，企硬「咪神」之位！月前，秀文踩入影壇拍攝由王晶監製、林子聰執導嘅電影《男神訓練營》，同「有料之人」高海寧、胡然及莊端兒晒泳裝正面交「峰」，但表現毫不輸蝕！經過呢場「胸」戰，張秀文深受王晶欣賞，東網日前發現張秀文同王晶喺酒店密密斟，睇嚟佢有機會升呢做「晶女郎」！

傾到笑晒口

日前大約晚上七點，化住淡妝、戴住眼鏡嘅秀文自己一個去到尖東某酒店，雖然佢只係着住緊身Tee，但佢強勁身材搞到身上嘅公仔變晒形，嗰隻公仔認真可憐，而佢下身短裙仔上陣大騷美腿。之後，王晶就單拖現身酒店，佢哋會合之後喺酒店內嘅日式餐廳密密斟，一傾就傾足兩粒鐘，睇嚟有唔少大計！傾到約晚上九點一齊坐電梯離開酒店，佢哋笑晒口咁款，相當投契，王晶仲好有風度咁車秀文離開。

咪咪唔畀漏氣

據知，秀文收到order唔使減肥，以防瘦人變瘦胸，要力保招牌34D咪咪，唔畀「漏氣」！觀乎過往晶女郎例如邱淑貞、朱茵、林熙蕾及關秀媚等，佢哋喺電影中都有超性感演出，令人更期待秀文嘅「突破」性演出！

唔使減但唔敢食

當晚密會王晶前，秀文為轉型「晶女郎」作好準備，佢單拖喺尖沙咀Shopping買衫。見佢主攻日本品牌潮服，又去首飾櫃台揀選，店員見到佢即落足嘴頭推銷，最終買咗一條閃爆手鏈。離開商場後，為食嘅秀文行經雪糕店即時眼望望，雖然有話唔使減肥啫，但佢似乎都唔敢亂食嘢，結果齋睇冇買。之後，佢行過小食店時，終於忍唔住，買咗一杯消脂飲品，再去酒店會合王晶。