【玩完‧後門走】洗米嫂開窿裙同洗米華預祝聖誕 打埋卡！

聖誕節就到，唔少公司都會開聖誕party同員工慶祝，太陽娛樂噚晚就喺將軍澳一酒店舉行聖誕派對，旗下藝人梗係有出席啦。但係最唔少得嘅，一定係老闆周焯華（洗米華），佢一到場，就有兩隻天線得得B同一個外星人打扮嘅員工迎接。

問到洗米華聖誕打算喺邊度過，佢笑笑口咁答：「咦？呢啲嘢點可以話得你知o架？」話時話，上個月23日，洗米華先同太太陳慧玲（Heidi）以及三名子女，出席太陽國際主席鄭丁港兒子Herry嘅16歲成人禮，咁洗米嫂噚晚又有冇去開party呢？答案係，有嘅！洗米嫂噚晚喺Instagram貼咗一張佢同大女周梓潼（Virginia）嘅合照，留言話係「太陽娛樂聖誕派對」，明顯就喺趁住party time同囡囡打卡啦。睇真啲洗米嫂條裙貼身得嚟仲喺側邊位開窿，盡顯佢弗爆身形。而呢位靚爆女主人玩完一輪，就喺後門離開。